Ordizia Siglo XXk irabazi egin zuen Txingudiren aurka, 31-28ko emaitzarekin bukatu zen partida. Partida honekin gabonetako etenaldiaren ondoren lehiaketari ekin zitzaion eta bigarren itzuliari hasiera eman ere. Ordiziarrek kontu handia zuten, ez zekiten nola erantzungo zuten 3 asteko geldialdiaren ondoren, eta, gainera, oso talde irregularra hartzen zuten. Ordiziarrek eskatzen zitzaienari erantzun eta garaipena lortu zuten. Garaipen honekin Ordizia Siglo XX taldeak sailkapeneko lehen postuan jarraitzen du, bigarren sailkatua 2 puntura utziz.
Ez zen partida bikaina izan Majorin ikusi ahal izan genuena, erritmo falta nabari zen bi taldeetan. Partidaren lehen zatia oso orekatua izan zen, eta inork ezin izan zuen partida hautsi. Bigarren zatiaren hasieran gauzak aldatu egin ziren eta 9-3ko partzialarekin ordiziarrek partida hautsi zuten, 7 goleko abantaila lortuz. Hortik aurrera Irungo taldea desabantaila bertan behera uzten saiatu zen, baina ezin izan zuen, ordiziarrek partidaren tempoari aurre egin eta garaipena eskuratu ahal izan zuten.
Garaipena defentsako lanean gauzatu zen berriro, bigarren zatiko lehen laurdenean 3 gol jaso ziren eta neurketa hautsi egin zen. Erregulartasun handiagoa eman behar diogu lan honi, partidan ez sufritzeko, hala eta guztiz ere 28 gol jaso baitziren, eta hori oso kopuru handia da. Erasoan ondo lan egin zen, baloia ondo mugituz eta abagune argiak sortuz, baina definizioan huts egin zen, 3 asteak lehiaketarik gabe nabaritu ziren, eta garaipena lortzeko estuago ibili zen.
Emakumezko seniorrak galdu egin zuen Donostian jokatutako partidan, Ordizia Biok2.com taldeak 30-25 galdu zuen Egiaren aurka. Partida gogorra eta irregularra izan zen Donostiako auzoaren kantxan ikusi ahal izan zena. Ordiziarrei asko kostatu zitzaien etxeko defentsa gainditzea, eta gure defentsa ez zen hain sendoa.
Atsedenaldira 3 goleko desabantailarekin iritsi ziren, baina bigarren zatiko lehen minutuetan lehia berdintzea lortu zuten. Baina jokoan ez zen erregularra izan eta 52. minutuan 3 goleko desabantaila zegoen markagailuan. Azkenean defentsan arriskatu zen baloiak berreskuratzeko, baina Donostiako taldeak 5 goleko aldea lortu zuen.
Ordiziarrak ez zuen gaizki jokatu, baina jokoan erregularragoa izan behar da garaipena lortu nahi bada. Defentsako eta erasoko lanari buelta bat eman behar zaio garaipenek ihes egin ez diezaguten. Nolanahi ere, Gabonetako etenaldia nabaritu da, eta espero dugu hurrengo partidetan gure joko-maila erakustea.
Jubenil mailan emakumezkoen taldeak Saiekoren aurka galdu zuen, 23-29 izan zen azken emaitza. Ordiziarrak ondo jokatu zuten, atsedenaldira gol bateko abantailarekin iritsi ziren, baina ezin izan zuten amaierara iritsi eta azkenean talde bisitaria nagusitu zen. Gizonezkoen taldeak 25-18 irabazi zion Elgoibarri, lehen minutuetatik nagusi izan zen partidan, eta atsedenaldira 4 goleko abantailarekin iritsi zen.
Kadete mailan bigarren urteko emakumezkoak ezin izan zuen Bergaran ezustean harrapatu eta 31-24 galdu zuen. Partida honekin Gipuzkoako Txapelketa itxi da, non talde ordiziarrak seigarren postua lortu duen 24 talderen artean. Oianguk, lehen urteko emakumezkoak, garaipen estua lortu zuen Eibarren aurka, 17-16, eta horri esker sailkapeneko gune nagusian mantendu da. Eniriok, lehen urteko emakumezkoak, 27-17 galdu zuen Saiekoren aurka. Gizonezkoen kadeteak, berriz, 23na berdindu zuen Andoainen, Leizaranen aurka, azken minutuetan garaipenak ihes egin zion partidan.
Infantil mailan ez zen zorterik izan, lehen urteko emakumezkoa 18-20 erori zen azkenean Bergararen aurka, norgehiagoka polit eta lehiatuan. Bigarren urteko emakumezkoa, berriz, Irunen erori zen, 31-12, lehen zati penagarri baten ondoren.